អាជ្ញាធរខណ្ឌប្ញស្សីកែវ យកគ្រឿងចក្រ វាយកម្ទេចផ្ទះរបស់ពលរដ្ឋចោលតែមួយពព្រិចភ្នែក
22-March-2020 | ដោយ ពលមនសិការ
ភ្នំពេញ៖ ផ្ទះមានទំហំ១០ម៉ែត្រ គុណ១៥ម៉ែត្រ នៅលើដីទំហំ២៦ម៉ែត្រ គុណ៥២ម៉ែត្រក្នុងតំបន់អភិវឌ្ឍន៍ប្ញស្សីកែវ ស្ថិតនៅតាមបណ្តោយផ្លូវ១៨០០ ក្នុងភូមិទួលពពែ សង្កាត់ទួលសង្កែ២ ខណ្ឌប្ញស្សីកែវ ដែលមានម្ចាស់ឈ្មោះ ភារម្យ អាយុ៤២ឆ្នាំ ជាមន្ត្រីនគរបាល ដែលមានប្តីឈ្មោះឃាម ឡុង ដែលជាមន្ត្រីនគរបាលនៃស្នងការដ្ឋានរាជធានីផងដែរ ត្រូវបានអាជ្ញាធរខណ្ឌប្ញស្សីកែវ យកគ្រឿងចក្រទៅវាយកម្ទេចចោលតែមួយពព្រិចភ្នែក កាលពីព្រឹកថ្ងៃទី២១ ខែមីនា ឆ្នាំ២០២០នេះ ក្រោមលេសចោទប្រកាន់ សំណង់នោះ បានសាងសង់ដោយខុសច្បាប់។
តាមព័ត៌មានឲ្យដឹងថា ការវាយកម្ទេចផ្ទះនេះជាការបង្ខំអោយទទួលយកដីឡូត៍ ជាថ្នូរនឹងការដោះស្រាយ និងម្យ៉ាងទៀតដោយខឹងមន្ត្រីនគរបាលរូបនោះនាំគ្នាបះបោរតវ៉ា ដោយមិនទទួលយកឡូត៍ ដែលបែងចែកដោយអាជ្ញាធរ។
តាមព័ត៌មានឲ្យដឹងថា នៅព្រឹកនោះ អាជ្ញាធរ បានប្រើកម្លាំងប្រមាណជាង១០០នាក់ ដោយមានការចូលរួមពីនគរបាលអន្តរាគមន៍ នៃស្នងការដ្ឋានរាជធានីភ្នំពេញការពារគ្រឿងចក្រ ដើម្បីវាយនិងបុកកម្ទេច ផ្ទះ២ល្វែងនេះ ក្រោមការចូលរួមសម្រួលពីព្រះរាជអាជ្ញារងសាលារាជធានីភ្នំពេញ។ នៅក្នុងឱកាសនោះអាជ្ញាធរ ក៏បានត្រៀមរថយន្តពន្លត់អគ្គិភ័យមួយគ្រឿង ខ្លាចកើតមានអំពើហិង្សាឡើង និងបានបិទច្រកហាមអ្នកយកព័ត៌មានចូលទៅឡាយព័ត៌មានការវាយកម្ទេចនេះ។ ទន្ទឹមការរុះរើនិងវាយកម្ទេចនោះគេឃើញស្ត្រីជាម្ចាស់ផ្ទះព្រមទាំងក្រុមគ្រួសារបានធ្វើការតវ៉ា តែត្រូវបានកម្លាំងសណ្តាប់ធ្នាប់និង សមត្ថកិច្ច ចាប់យកចេញ។
តាមស្ត្រីជាផ្ទះ បានអោយដឹងថា ការវាយកម្ទេចផ្ទះរបស់គាត់ដើម្បីបង្ខំអោយគាត់ទទួលយកការដោះស្រាយដីមួយឡូត៍ទំហំ៤ម៉ែត្រគុណ១៥ម៉ែត្រ ដែលអាជ្ញាធរឈូសឆាយដីរបស់លោកព្រំ បូរ មកចែកអោយពួកគាត់១៧៧គ្រួសារ ។ ការអះអាងថា ផ្ទះរបស់គាត់អត់ច្បាប់គីគ្រាន់ជាលេសតែប៉ុណ្ណោះ ។
តាមស្ត្រីជាម្ចាស់ផ្ទះអោយដឹងទៀតថា លោកស្រីរួមទាំងប្រជាពរដ្ឋ ទាំងអស់១៧៧គ្រួសារ ត្រូវបានអាជ្ញាធរចោទប្រកាន់ថា រស់នៅដោយមិនស្របច្បាប់ជាន់លើដី អ្នកដែលទិញសាលារាជធានីភ្នំពេញ។ដើម្បីដោះស្រាយសាលារាជធានីភ្នំពេញ ក៏បានឈូសឆាយយកដីរបស់លោកព្រំ បូរ មកបែងចែកអោយពួកគាត់ដែលក្នុងនោះ មាន១០០គ្រួសារ បានទទួលយកគោលនយោបាយ ហើយ ភាគច្រើនបានលក់អស់ហើយ នៅសល់៧៧គ្រួសារទៀតមិនទទួលដោយទាមទារសុំរស់នៅកន្លែងដើម។
តាមម្ចាស់ផ្ទះនោះ បានឲ្យដឹងទៀតថា អាជ្ញាធរ បានប្រើកម្លាំងវាយកម្ទេចផ្ទះរបស់គាត់បែបនេះតើអោយទៅរស់នៅកន្លែងណា? បើបង្ខំអោយគាត់ទទួលយកដីឡូតី៍នោះ អោយគាត់ទៅរស់នៅយ៉ាងមេច បើកអត់ទឹកអត់ភ្លើង បែបនោះ។ លោកស្រីបញ្ជាក់ទៀតថាបើ ត្រូវរុះបង្ខំអោយទទួលយកដីឡូត៍គឺរុះទាំងអស់គ្នា នៅពេលណាមួយដែលអាជ្ញាធរ រៀបចំប្រព័ន្ធទឹកភ្លើង រួចហើយ មិនគួរ រុះតែគាត់ម្នាក់ នោះទេ។ តាមព័ត៌មានអោយដឹងថា ការប្រើកម្ទេចវាយកម្ទេចផ្ទះ២ល្វែងរបស់មន្ត្រីនគរបាលនេះ គឺដោយសារតែខឹងបះបោរ មិនទទួលយកដីឡូតិ៍ តែអាជ្ញាធរ បានចោទប្រកាន់ថា ដោយសាតែសំណង់នោះអត់ច្បាប់។
ប្រភពមួយច្បាស់ការណ៍បានអោយដឹងថា ម្ចាស់ផ្ទះសុំច្បាប់សាងសង់ តែលោកអភិបាលរងខណ្ឌម្នាក់បានអោយម្ចាស់ផ្ទះ សាងសង់ទៅ ដោយមិនចេញច្បាប់អោយ ដល់ពេលអភិបាលខណ្ឌបញ្ជាអោយវាយកម្ទិច ខាតប្រយោជន៍ពលរដ្ឋអ្នុកទទួលខុសត្រូវ បើអភិបាលរងយកលុយដាក់ហោប៉ៅបាត់ហើយ ៕
ចំនួនអ្នកទស្សនា
- ថ្ងៃនេះ5301
- ម្សិលមិញ15191
- សប្តាហ៍នេះ48451
- ខែនេះ70331
- ឆ្នាំនេះ70331
- សរុប20512787